Stay hungry. Stay foolish.

昨日City的Fitness room休息，順理成章我都可以休息一日，所以今日又係留在家中，玩玩電腦，睇睇電視，講講電話，咁又一日．今日同阿肥同偉哥講左成兩個小時電話，聽阿肥講下佢在美國的近況，又講下我預備去美國的事情，講得好開心，不過阿肥今個月電話費應該又會再一次創新高，到時佢媽媽睇到張電話費單，應該會比我們更開心．聽阿肥講，佢雖然多朋友仔，但係真係好close的又冇乜幾個，令我諗起我自己，8月就去美國，我果度仲要係冇乜香港人，冇乜中國人，又荒蕪，又冇咩娛樂場所，比起阿肥果度真係差太多，唔知我會唔會更加困難去搵朋友呢？突然令我諗起果日阿俊源兄打俾我同我講果句「人離鄉賤」，有少少擔心，不過點都好，我諗我可以克服到，始終我都想去美國，想出去見下世面，睇下唔同的世界．

前日和小敏去沙田睇戲，睇<10天戀愛有限期>，都幾好睇，不錯！一開始睇的時候，覺得個男主角唔係好掂，後尾先愈睇愈順眼，不過，如果個男主角係由Brad Pitt或者Ryan Phillippee做的話，說服力一定高好多！套戲的劇情同我最近睇果幾本所謂的少女小說差不多，男主角都係一樣，又係事業有成，高大，靚仔，好受女仔歡迎但只愛女主角一個的模式，嘩！如果世間上真係有個咁既男仔做我個男朋友就好喇！可惜，事實係呢個世界冇奇蹟，奇蹟在耶穌被釘十字架之後已經冇晒喇！

小敏送左份禮物俾我，佢同我講話「大個女係時候要用喇！」，我估左好耐都估唔到係咩，佢叫我返到屋企先拆，於是我又好聽話咁真係返到屋企先拆．臨拆開前，我叫我哥估下係咩，佢一口咬定話係香水，我拆開睇下，真係！佢又會咁叻估到，反而我估極都估唔到？

終於都俾我搵到本講孝莊皇太后的小說，前幾日去三聯，去Page One都冇，結果給我在沙田間商務搵到．最近我好迷孝莊皇太后，電視劇＜孝莊秘史＞我一集都冇遺漏過，又上網睇左好多有關佢的事蹟．佢真係一個好叻的女人，居然可以在一個以男人為本體的社會裡，為自己爭得如此祟高的地位，為整個國家奠下強大穩固的根基，清朝能夠有有長達二百多年的國祚佢居功不少．佢係一個我好尊敬亦以佢為目標的偶像．作為一個女人，可以好似佢咁，在事業上有一番作為，名留青史，夫復何求？