Stay hungry. Stay foolish.

昨日同阿Him，阿鉦，立仁，Oiwa，阿Man，阿金佢地去左石澳玩，真係好開心，可以話係我今個暑假玩得最開心的一日．其實我冇落過水（呢個可以話係昨日的一個遺憾），不過十幾年冇去過海濰，咁難得有班朋友仔同我去，果種心情，真係就咁玩沙都開心．

我成日覺得去海灘係一件麻煩的事，事實上又唔係．我地約埋一齊在筲箕灣等，然後去茶餐廳食飯，跟住去惠康買定夜晚去燒烤的用具，再搭小巴入石澳．去到果度，租左把沙灘遮，鋪好張席就開始玩喇！佢地游呀游，游左出浮台，我就係度玩沙．隔左冇幾耐，佢地就返唻，大家一齊踢波，踢毽，玩啤牌，影下相咁啦！果度個景色真係好靚，人又靚，不過最緊要都係身材好鬼正！在我們隔壁有班竹昇，班女仔個個都身材嬌人，個胸又大，條腰又細．嘩！我都好想有咁樣的身材呀，可惜呀，得個恨字，唔知幾時先可以著到三點式呢？（希望下年暑假可以啦！）

玩到咁上下，Oiwa去左搵爐，點知個場已經被人霸晒，冇得係石澳燒，結果阿Man打電話俾佢朋友book爐去赤柱燒．我地搭小巴再轉巴士入赤柱，去到join埋阿祖同輝光，跟住去百佳買野食．買完就搭的士入去懲教署宿舍度，開始燒野食．後來伍文傑都唻埋，佢起勢咁唱歌，搞到我成日都忍唔住笑左出唻．

玩到十一點幾，我，阿祖，阿金就走先．我地搭小巴出銅鑼灣，我再轉搭隊巴去紅磡趕火車，又俾我趕到，真係好．差不多一時多回到家．

我發覺咁多個朋友裡面，我應該係最唔識得煮食果個．Oiwa就唔駛講啦，見阿祖，阿鉦，立仁佢地都咁叻煮野食，我作為一個女仔，有時都幾慚愧．希望啦，去完外國返唻會識煮野食，下次返唻煮返幾味俾大家試下，睇下得唔得啦！

見佢地猛咁Plan定下星期二去遊船河的事宜，搞到我都好想好想去，可惜呀．．．決定左，要趁今年學踩水，然後下年返唻一定再捉大家陪我去過，哈哈！