Stay hungry. Stay foolish.

一心要食酒店套票送果個早餐, 諗住小睡片刻早起身落去, 點知周公唔放人, 最終都起唔到身. 阿謙仲勁, 為左食早餐而通頂, 可惜最後又係俾周公捉左去, 仲要係早餐開始前一個鐘先失守, 真係冇陰公! 總括來講, 我地四個人一直到十一點幾先起身, 多得阿祖係唯一一個聽到鬧鐘響的人, 如果唔係佢我地肯定趕唔切check out, 然後就要俾多一晚房租. 不過話時話, 我真係連少少鬧鐘響的聲都聽唔到, 真係擔心將來點樣自己搬出來住, 唉~

快快手整好野, check埋out就去左新馬路鉅記度買手信. 以我記憶所及, 澳門最出名的乜唔係咀香園咩? 點解冇唻一段時間會變左做鉅記? 鬼死咁多明星相係門口, 好似好勁咁, 我地逗留左都唔知有冇二十分鐘, 見到的情況真係只可以用「貨如輪轉」同「客似雲來」來形容, 唔知佢地每日的生意額會唔會多個二十萬呢? 我地買左幾盒杏仁餅, 幾包春卷仔, 幾包香蕉糕, 幾包花生糖, 幾包豬肉乾同一包老婆餅後就坐的士去三盞燈度食魚湯粉.

其實果間野的魚湯粉都冇乜咁特別, 亦都唔係真係太好食, 不過一場來到, 就當叫做見識一下當地的馳名小食. 可能果度太多人, 個女侍應遲左拎碗野俾我地, 結果碗野索晒水兼且有少少涷, 我諗如果個湯唔係咁杰的話碗粉應該都okay的. 食完粉後, 我地坐的士去路環小型賽車場, 其實都掙扎左幾耐究竟去唔去好, 話晒落緊毛毛雨, 我自己就冇玩過, 但聽阿肥講都okay危險......不過阿謙想玩, 咁唯有去碰下運氣啦!

坐左七十幾蚊的士, 去到等左個幾兩個鐘, 錢都俾埋鞋都換埋, 居然呢個時候班師傅先同我地講話個場仲好濕, 太危險, 叫我地唔好玩; 唔係, 佢冇直接講, 但就話「拿~ 咁既然你地係都要玩, 咁我都要俾你架! 你想玩咪玩囉!」聽佢講到好似我地要去死佢冇理由阻止, 又講到淺起的水柱會去到成米高, 又話跑道太滑唔適合轉彎只可以玩直路咁, 我地幾個最怕死的當然第一時間返去退錢啦, 始終生命寶貴嘛! (阿謙, 真係唔好意思, 用左咁多錢過去居然玩唔到你想玩的; 下次有機會再去的話我再同你去玩過啦, 好唔好?)

跟住我地坐接駁巴士出返去葡京路度再轉巴士去瑪閣廟. 我地買左一紮香大家一齊拜, 睇下廟入面果隻百年大海龜, 仲上埋去頂頂個觀音閣. 阿肥想求籤, 不過我地上到去時, 解籤的大叔要收工, 於是乎我地行左落中間果間細廟度, 點知阿婆婆話佢唔識解籤, 叫我地落去大廟度求. 聽婆婆講原來呢間細細的係咁多間廟中最老的一間, 已經有成五百幾年歷史, 仲要係天后娘娘親自選址的 (唔怪得可以保存到咁耐啦!) 之後我地落左去大廟度陪阿肥同阿祖兩個求籤. 解籤人的口音真係好搞笑, 究竟係金錢定係感情困擾呢? 大家聽到的都有唔同, 迫住阿肥要當面問下佢要佢解釋一下, 哈!

之後我地坐巴士去港澳碼頭, 原來都差不多夠鐘上船返香港喇! 唉~ 拜拜, 澳門! 又要等下年返來先可以再去玩!