Stay hungry. Stay foolish.

起床時已經兩點幾, 睇下手電, 有三個missed calls, 分別來自大咀, 阿太同家姐. 打返俾佢地, 同佢地講我唔出去飲茶同埋晏些少先上仁寶, 跟住就起身換衫出去搵大衛.

由於太趕的關係, 戴耳環呢個動作就留返係火車上面完成. 可惜一向男仔頭的我, 半年都唔戴一次耳環, 原來有一邊個耳窿已經埋口咩都戴唔落. 嘗試用力左拮右拮, 睇下有冇機會可以好似上次咁自己穿返個窿, 不過今次冇咁好彩, 隻耳仔見晒紅都係戴唔返隻耳環, 唉~

半年冇見, 估唔到大衛兄都仲keep得幾好呀! 去左食下午荼(其實係我地的早餐加午飯), 傾下呢樣傾下果樣咁又過左好長時間. 跟住去行下街睇下衫, 陪阿大衛兄去睇型到爆的西裝褸, 跟住去左睇電話.

又係度見到甘美, 兩個人作狀扮買電話同sell電話. 我話最近都冇乜款靚, 想買部可以影相, 有相來電顯示, 又要細部同埋輕的摺機真係唔易, 得motorola果部叫做岩條件, 但甘美立即好絕情咁話部機超樣衰, 叫我點都唔好買. 後來甘美介紹部三菱的俾我, 大衛係隔離又加兩咀講埋一份, 點知俾甘美串鬼佢果部得25色, 當堂成個人頹晒冇野好講.

之後大衛約左人打波, 我見阿太同家姐都仲行緊街, 於是乎走去尖咀搏買Tiffany. 係地鐵站撞到好耐冇見的simon, 傾左一陣先走. 去到半島先知果間Tiffany裝修, 十萬個無奈, 兜左兩個圈都係頂唔順要走.

上到仁寶照例打緊麻雀, 於是乎我走左入房玩電腦. 冇幾耐阿太同家姐返唻, 仲有玲姐, 寶如同阿強. 幾個女仔入房傾下化妝品護膚等話題, 講到咁上下就出去食飯. 第一次揀左隻深藍色的碗, 唔要淺藍色, 要學下習慣, 唔好等第日先唻轉咁麻煩.

同阿太, 家姐, 強姐同bowie傾到點幾, 已唔到尾班車, 於是阿太唔俾我走, 要我留低過夜. 咁多年來只留過在仁寶過夜兩次, 佢走之前係第一次, 今次係第二次; 估唔到呢個時候我居然會係佢屋企渡過. 見冇野做於是乎再接再厲, 一直講到三點幾bowie同阿太先走, 我同家姐同強姐三個就傾下玩下搞到天光先?覺.

真係好感激大家咁錫我, 就算我地已經唔係一齊, 但佢地依然係對我一樣咁好, 真係好感動. 無論將來係點都好, 我都會去探大家, 因為我係仁寶的一份子嘛 :p
?到十二點先起身, 見大家都仲?緊, 於是寫低張紙走先. 去左cwb, 買左件一直都好想要的東西. 家姐問我點解咁想要又唔一早買, 當然錢係一個好重要的問題, 但係最重要的, 係呢件物件對我的意義. 我想要它, 更想要由他送給我的它. 家姐笑話不愁冇人送給我, 哈! 可能吧! 只是每件物件背後總有一個故事, 這故事也為它訂下了一個價; 就如很多人都認為汽水蓋掩好cheap, 但對於一個其初戀男友用汽水蓋掩當做指環送她的女人來講, 這個汽水蓋掩的價值可能比一枚紅寶石指環還要高. 愛的不是這個蓋掩, 愛的是它背後那個曾經擁有的承諾; 縱使最後做不到, 但至少我們曾經有過這個想法亦一起努力過. 這是一個紀念品, 因為你而特別, 因為它代表著一個無法完成的承諾. 至於我, 不會強求什麼, 只是覺得這個「承諾」既是屬於我倆, 我絕不許別人來玷污, 如果真要破壞的話, 由我親手破壞好了, 與其由別人手上得到, 倒不如我自己買下. 買了它, 圓了一個心願, 也完了一份眷戀.